Sivjet Hani i 2 Robertëve përmbushi 35 vjet të veprimtarisë si kafe, restorant dhe galeri. Gjatë periudhës 1989-2024 në Han janë organizuar më shumë se 200 ekspozita dhe aktivitete tjera kulturore.
Për ekspozitën jubilare kemi ftuar dhe përzgjedhur disa nga artistët dhe veprat që janë ekspozuar te Hani gjatë periudhës jubilare.
Në kohën e themelimit si kafiteri te Kurrizi, Hani pretendonte rol modest të alternativës subkulturore. Në vitet e 90-ta, Hani shndërrohet në qendër të rezistencës kulturore, por edhe qendër informative. Ishte vendtakim i liderëve politik, diplomatëve, publicistëve dhe gazetarëve elitarë botëror.
Nga Hani jan përhapuar lajmet dhe të vërtetat mbi rezistencën e Kosovës ndaj pushtimit serb.
Edhe pas çlirimit Hani gjen moduse për gërshetim të rafinuar të gastronomisë me kulturën, duke e ruajtur traditën e institucionit kulturor të pavarur.
Hani sot mbetet institucioni më i vjetër i kulturës së pavarur në Kosovë.
Ekspozita përkrahet nga Ministria e Kulturës, Rinisë dhe Sportit, si dhe Komuna e Prishtinës.
